Atti di u workshop di u 2014 pubblicati!

U 22 è u 23 di settembre di u 2014 hè statu urganizatu à l'Università di Corti (UMR 6240 LISA) un workshop dedicatu à e lingue di l'isule è à l'isule linguistiche. Di decembre di u 2016 sò stati pubblicati l'atti di issu workshop à l'Edizioni dell'Orso (Alessandria) ind'a cullana Lingua, cultura, territorio diretta da Tullio Telmon. Ind'è issu libru si trovanu testi dedicati à a Corsica, à a Sardegna è à l'Isule Eolie ma ancu, per ciò chì tocca à l'isule linguistiche, à e parlate greche di l'Italia meridiunale.

Per ciò chì tocca à a Corsica, un articulu di Philippe Boula de Mareuil, Albert Rillard è Hélène Maynard amenta un fattu d'intunazione caratteristicu à l'isula è cun poche sumiglie in altre aghje rumanze ma arradicatu in zone di cuntinuità storica è geografica cù a Corsica (Sardegna, Tuscana). Per ciò chì tocca à a morfulugia, un articulu di Vincenzo Faraoni è di Michele Loporcaro amenta cù assai cura e vistiche di u neutru latinu ind'e parlate corse cismuntinche, basendusi nant'à una prima seria d'inchieste di terrenu in Corsica. A morfulugia corsa hè ancu studiata da Lorenzo Filipponio chì hà dedicatu un studiu à i verbi chì presentanu l'infissu -eghj- ind'a so cunghjucazione; issu studiu s'arremba anch'ellu nant'à inchieste di terrenu fatte in Cismonte è permette di fà un puntu di e cunniscenze nant'à issu suggettu. U lessicu corsu di l'allevu hè studiatu quì da Francescu Maria Luneschi mentre chì Aurelia Ghjacumina Tognotti amenta fatti lessicali cumuni à a Corsica, à Tuscana, a Liguria è a Calabria ind'è u campu di l'agricultura. Stella Retali-Medori, trà lessicu è funetica diacronica, mette in risaltu prublemi di cuntinuità è discontinuità trà Corsica è Terraferma, cun fatti d'innuvazione linguistica specifichi à a Corsica è u nordu di a Sardegna in leia cù a Liguria è e parlate ibero-rumanze.

À a Sardegna sò dedicati trè articuli, u primu essendu quellu Jean-Pierre Lai chì face un panurama di a storia di a lingua sarda, mentre chì Lucia Molinu, basendusi nant'à inchieste di terrenu, studieghja l'adattamenti funetichi di e parolle nove chì entrenu in sardu. Simone Pisano, per contu soiu, amenta prublemi funetichi usservati ind'a parlata di Fonni, in pruvincia di Nuoru.

Infine, l'Italia meridiunale hè presente grazie à Franco Fanciullo chì mette à cunfrontu duie campagne d'inchieste linguistiche in l'Isule Eolie è i risultati prudutti da isse duie campagne. Antonio Romano amenta ellu a situazione di e cumunità di lingua greca in Calabria è in Salentu, paragunendu e pulitiche linguistiche di rivitalisazione è i risultati chì si ponu usservà sopr'à locu.

  • Facebook Clean Grey
  • Twitter Clean Grey
  • LinkedIn Clean Grey

© 2015 by Stella Retali-Medori Personal. Proudly created with Wix.com